З вядомым рэлігіязнаўцам развіталіся ў гомельскім касцёле

У касцёле Нараджэння Божай Маці ў Гомелі 17 траўня адбылася пахавальная святая Імша. Мясцовыя вернікі, а таксама калегі развіталіся з Віктарам Адзіночанка, які адыйшоў у вечнасць 15 траўня на 63-м годзе жыцця пасля імклівай хваробы.

Віктара Аляксандравіча, які каля 30 апошніх гадоў быў вернікам каталіцкай парафіі ў Гомелі, ведалі як добрага хрысціяніна, любячага мужа і бацьку, выдатнага навукоўца, а таксама грамадскага дзеяча, які змагаўся за адмену смяротнага пакарання, пазітыўныя змены ў грамадстве.

Шмат гадоў ён выкладаў рэлігіязнаўства і філасофію ў Гомельскім дзяржаўным універсітэце імя Ф. Скарыны, быў дацэнтам, кандыдатам філасофскіх навук. Апошні час працаваў над абаронай доктарскай дысертацыі.

Віктар Адзіночанка – аўтар шматлікіх навуковых публікацый, у першую чаргу – вучэбнага дапаможніка па рэлігіязнаўстве для студэнтаў вну.

Таксама ён выпускаў працы па сучаснай рэлігійнай сітуацыі ў Беларусі, аб будучым рэлігіі ў беларускім грамадстве, разглядаў праблему секулярызацыі і рэлігійнай талерантнасці, быў госцем праграм Ватыканскага радыё.

Наш канал в Telegram – только интересное и важное. Подписаться >