Колькі семінарыстаў давучваюцца да канца? Сёлетняя колькасць – паказальная

Хутка ў Беларусі могуць з'явіцца чатыры новых каталіцкіх святара. Гэта выпускнікі Гродзенскай семінарыі, якая паведаміла, што пасля 7 гадоў вучобу завяршылі Андрэй Януль, Антон Тышко, Марцін Лудзіч і Яраслаў Казлоўскі. Цяпер яны рыхтуюцца да дыяканскага пасвячэння.

Гэта тыя студэнты, якія паступілі ў семінарыю ў 2018 годзе – пасля рэформы падрыхтоўкі да святарства, калі Гродзенская семінарыя стала міждыяцэзіяльнай, а Пінская – дыяцэзіяльнай, і ў далейшым была закрыта.

Мы знайшлі звесткі пра тое, што паступалі ў абедзве семінарыі тады 10 хлопцаў. Атрымліваецца, давучыліся і захавалі жаданне стаць святаром толькі 4. Ці такая сітуацыя – звычайная?

Так, адказаў нам былы семінарыст, які таксама пакінуў вучобу, але скончыў іншую вну і цяпер працуе катэхетам. Паводле яго, у сярэднім давучваюцца да канца каля адной трэці з тых, хто паступіў у семінарыю. Таму 4 з 10 – гэта неблагі вынік.

У сацсетках мы пашукалі тых, хто паступаў у семінарыю ў 2018 годзе і пакінуў вучобу. Некаторыя з іх ужо маюць свае сем'і, дзяцей, пры гэтым засталіся практыкуючымі вернікамі, не пакінулі Касцёл.

Варта мець на ўвазе, што семінарыя – гэта не месца, дзе «вучаць на святароў», а дом распазнання паклікання, як тлумачыў адзін з ужо былых семінарыстаў:

«Пэўныя ўмовы, дысцыпліна, супольныя малітвы, спевы, вучоба, праца і адпачынак могуць дапамагчы ва ўзрастанні на шляху да святарства».

Нездарма вучоба ў каталіцкай семінарыі доўжыцца аж 7 гадоў, каб за гэты час кандыдат да святарства мог дакладна распазнаць, ці мае менавіта такое пакліканне. Бо ў гэтай сферы, як нідзе, якасць важнейшая за колькасць.

Наш канал в Telegram – только интересное и важное. Подписаться >