Стала вядома, калі ў цэнтры Мінска католікі правядуць масавае шэсце

Правядзенне агульнагарадской працэсіі Божага Цела запланавана ў Мінску сёлета на нядзелю, 15 чэрвеня. Мяркуецца, што ўрачыстае шэсце, як і раней, пачнецца ад касцёла на Залатой Горцы і пройдзе праз цэнтр сталіцы, паведамілі парафіянам пробашчы сталічных парафій.

Свята Цела і Крыві Хрыстовых, да якога прымеркавана працэсія, сёлета католікі адзначаюць у чацвер, 19 чэрвеня. У Мінску, і ў многіх іншых гарадах правядзенне Эўхарыстычных працэсій звычайна пераносяць на бліжэйшую пасля свята нядзелю, каб большая колькасць вернікаў мела магчымасць прыняць удзел ва ўрачыстым шэсці. Але сёлета працэсію ў Мінску запланавалі правесці перад святам – па дзвюх прычынах.

З-за «позняга» Вялікадня ўрачыстасць Цела і Крыві Хрыстовых прыпадае на другую палову чэрвеня, у той час як у Мінску імкнуцца праводзіць працэсію ў канцы мая – пачатку чэрвеня, да разгару канікул і сезону адпачынкаў, каб больш вернікаў змаглі сабрацца на набажэнстве.

Па-другое, бліжэйшая нядзеля пасля ўрачыстасці – 22 чэрвеня, калі дзяржава адзначае «Дзень усенароднай памяці ахвяр Вялікай Айчыннай вайны і генацыду беларускага народа». На гэтую дату ў горадзе запланаваны адпаведныя мерапрыемствы.

Другі горад Беларусі, дзе арганізуюць найбольш масавыя працэсіі Божага Цела па цэнтральных вуліцах, – Гродна. Тут звычайна дату правядзення шэсця не пераносяць і праводзяць у чацвер, непасрэдна ў дзень свята. Гэта значыць, што сёлета працэсія ў Гродне павінна прайсці 19 чэрвеня.

Працэсія Божага Цела – гэта штогадовая «маніфестацыі веры», прысвечаная святу Найсвяцейшага Цела і Крыві Хрыста. Вернікі ідуць з урачыстай і прыгожай працэсіяй па цэнтральных вуліцах, каб дабраславіць горад, дамы і працоўныя месцы, маліцца аб тым, каб Гасподзь зберагаў ад голаду і вайны, каб нагадаць пра ахвяру і любоў Хрыста, засведчыць аб сваёй веры.

У Эўхарыстычнай працэсіі ідуць дзеці ў белай вопратцы, якія высцілаюць дарогу пялёсткамі кветак для Езуса Хрыста. Ягонае Цела пад выглядам хлеба нясе святар у Манстрацыі. Па дарозе працэсія спявае і здзяйсняе прыпынкі ля чатырох алтароў для пакланення Целу Хрыста, для малітвы і чытання Евангелля.

Наш канал в Telegram – только интересное и важное. Подписаться >