Моцны вецер не сарваў працэсію католікаў у Гродне, але ў адным месцы яе давялося адмяніць

Увечары 19 чэрвеня праз цэнтр Гродна прайшла каталіцкая працэсія. Вернікі сабраліся на «маніфестацыю веры» з нагоды ўрачыстасці Цела і Крыві Хрыста. Гэта штогадовая Эўхарыстычная працэсія, якая праходзіць па вуліцах населенага пункта, каб дабраславіць яго, нагадаць пра ахвяру і любоў Хрыста, засведчыць пра сваю веру.

У гэты раз католікам у Гродзенскай вобласці давялося праводзіць працэсіі Божага Цела ва ўмовах моцнага ветру і дажджу. Аднак непагадзь не сарвала шэсце ў Гродне [глядзіце ніжэй відэа – са сторыс у профілі біскупа Гродзенскага].

У нейкі момант грознае неба нават парадавала яркай вясёлкай, якую лічаць знакам надзеі і Божага дабраславення.

Таксама бачылі вясёлку ўдзельнікі працэсіі ў Гудагаі, дзе шэсце праводзілі пад дажджом.

А ў населеным пункце Варняны акрамя моцных парываў ветру і дажджу прайшоў яшчэ і град. Таму тут працэсію давялося адмяніць і перанесці яе правядзенне на раніцу нядзелі.

Нагадаем, у Мінску масавая працэсія Божага Цела прайшла 15 чэрвеня [фота, відэа]