Без біскупа і публічнасці адзначылі свята ў Вільні беларускія католікі ў эміграцыі

Фэст супольнасці беларускіх католікаў у Вільні прайшоў 24 жніўня, у дзень памяці апостала Барталамея, імя якога носіць беларускі касцёл у літоўскай сталіцы. У гэты раз упершыню не з'явілася публічных справаздач аб парафіяльным свяце – супольнасць не можа дзяліцца шматлікімі момантамі свайго жыцця з меркаванняў бяспекі вернікаў і гасцей парафіі.

Фота амаль не публікавалі ў сацсетках ні парафіяне, ні паблік супольнасці [UPD: на трэці дзень пасля фэсту некалькі здымкаў выклала парафія].

Вядома, што на свяце чакалі біскупа Гродзенскага Уладзіміра Гуляя. Але за тыдзень да фэсту ў парафіі абвясцілі, што біскуп не прыедзе. Прычыны не афішуюцца.

Грамадзянам Беларусі трапіць цяпер у Літву не так проста. Каб на асабістым аўто з беларускімі нумарамі ўехаць у краіну, трэба мець від на жыхарства ў Літве ці літоўскую візу. Да таго ж, чэргі на ўезд у суботу і раніцай у нядзелю перавышалі 200 аўто – час чакання складаў каля 20 гадзін.

Напярэдадні свята ў Вільні біскуп Гродзенскі быў на ўрачыстасцях у Браславе, на мяжы з Латвіяй. Адтуль праз суседнюю рэспубліку таксама можна было б дабрацца ў сталіцу Літвы. Але бліжэйшы ад Браслава пункт пропуску ў Латвію цяпер закрыты, а ўмовы ўезду прыкладна такія ж, як і ў Літву.

Нагадаем, у чэрвені беларускую супольнасць у Вільні ўпершыню за доўгі час змог наведаць іерарх з Беларусі – гэта быў біскуп Андрэй Зноска.

Затое цяпер на свята беларускай парафіі ў Вільні прыязджаў музыка, які працягвае жыць у Беларусі – ён парадаваў канцэртам суайчыннікаў у эміграцыі. Аднак імя артыста не называецца – зноў жа з меркаванняў яго бяспекі.

Наш канал в Telegram – только интересное и важное. Подписаться >