Папулярны блогер дапамог свайму сябру, бізнэсоўцу, стаць католікам

Жнівень 27, 2025
Written by KATOLIK.LIFE
Published in Царква
Add new comment

А сам Пан Усялян часам ненавязліва прасоўвае ў сваіх відэа каталіцтва.

Артыст і блогер Алег Грышко з Ліды, вядомы як Пан Усялян, паказаў у сторыс на сваёй старонцы чын далучэння да Каталіцкай царквы свайго сябра. Як мы даведаліся, гэта – бізнэсовец, прадстаўнік гродзенскага аўтакаміса Міхаіл Петрукоўскі, а акрамя таго ён – магістр псіхалогіі.

Як вынікае з ранейшых пастоў Алега, пасля знаёмства з Міхаілам яны сталі блізкімі сябрамі і «настаўнікамі» адзін аднаму.

Чын далучэння да Каталіцкай царквы, падчас якога Міхаіл вызнаваў веру, прайшоў непублічна 26 жніўня ў касцёле ў пасёлку Радунь, які наведвае сам блогер і сябруе з мясцовым пробашчам.

Верагодна, Міхаіл быў ахрышчаны ў праваслаўі, а цяпер змяніў канфесію.

Дарэчы, Пан Усялян не раз выкладваў фота з касцёла, паказваючы сваю веру, а ў роліках часам ненавязліва прасоўвае каталіцтва. Напрыклад, у нядаўнім гумарыстычным відэа ён паказаў газету «Словы жыцця» Гродзенскай дыяцэзіі.