Як праходзяць у рэгіёнах Маёвыя набажэнствы, паказалі на Гродзеншчыне

На працягу траўня – месяца, які ў Каталіцкай Царкве асабліва прысвечаны Найсвяцейшай Панне Марыі, у касцёлах праходзяць Маёвыя (майскія) набажэнствы. На захадзе Беларусі распаўсюджаная традыцыя, асабліва сярод жанчын, збірацца на такія набажэнствы не толькі ў храмах, але і на вуліцы – ля прыдарожных крыжоў і капліц.

Свежыя здымкі з такой малітвы апублікавала парафія ў Дзятлаве [глядзіце ніжэй]. Тут жанчыны з'язджаюцца на роварах да прыдарожнага крыжа, ля якога побач з фігурай Марыі парафія ўсталявала памятны камень з нагоды 525-годдзя горада.

Верніцы спяваюць літанію да Багародзіцы ды іншыя рэлігійныя песні. Звяртае на сябе ўвагу, што тэкст песень на польскай мове напісаны кірыліцай.

Традыцыя Маёвых набажэнстваў, неад'емная частка якіх – літанія да Багародзіцы (ад грэцкага lite – «прашэнне, руплівая малітва») распаўсюдзілася ў Еўропе ў XIX стагоддзі. А сама літанія да Панны Марыі з'явілася яшчэ ў XIII стагоддзі. У яе існуе некалькі версій, сярод якіх самая папулярная – «Ларэтанская», якую зацвердзіў Папа Рымскі Сікст V ў 1587 годзе. Некаторыя крыніцы адзначаюць, што Маёвыя набажэнствы маюць багатую гісторыю, якая пачынаецца яшчэ ў Егіпце. Ужо ў V стагоддзі хрысціяне (копты) на працягу ўсяго месяца спявалі песні ў гонар Багародзіцы.

Вось і цяпер вернікі збіраюцца на Маёвыя набажэнствы, а песні ў гонар Найсвяцейшай Панны Марыі спяваюць не толькі ў касцёлах.