Бібліі 16 стагоддзя і «Апостала» ў пацерках выставілі ў Гомелі - ФОТА

20 лютага ў гомельскім філіяле Веткаўскага музея стараверства і беларускіх традыцый адкрылася выстава «Пераплётных спраў майстры. Мастацтва ўпрыгожвання кнігі». Невялікая экспазіцыя ўяўляе рукапісныя і старадрукаваныя кнігі 16 - пачатку 20 стагоддзяў у вокладках, упрыгожаных чаканкай, ліццём, эмалямі, пацеркавым шыццём. Адкрыла выставу галоўны захавальнік музея Святлана Лявонцьева:

- Як да вопраткі, здольнай не толькі ўпрыгожыць, але і абараніць кнігу, ставіліся да вокладкі ў стараверскім народным асяроддзі. Традыцыйная «адзежа» рукапісных і старадрукаваных кніг - гэта дубовыя дошкі, абцягнутыя скурай з арнаментальным цісненнем, і зашпількі. Багатымі і выдатнымі ўборамі адрозніваліся Евангеллі і Апосталы, якія ўдзельнічалі ў рытуале літургічных службаў. Евангелле апраналі ў аксаміт, парчу, упрыгожвалі камянямі, жэмчугам, каштоўнымі металамі. Знешняя прыгажосць была закліканая прыцягнуць увагу да тэкстаў кніг.

На жаль, багатае ўбранне Евангелля не захавалася - пасля рэвалюцыі ўсе каштоўнасці канфіскавалі ўлады бальшавікоў, таму да сучаснікаў дайшлі простыя «адзежы».

Сярод выстаўленых кніг - рукапіснае Евангелле 1-й чвэрці 16 стагоддзя, а таксама Евангелле беларускага друкара Пятра Мсціслаўца, выпушчанае ў Вільні у 1575 годзе. Яшчэ адзін рарытэт - «Апостал» 1635 году, «апрануты» ў зялёны аксаміт з пацеркавай вышыўкай.