Выйшаў фільм аб гістарычным абліччы Гомеля з 3D-макетам узарванага касцёла [ВІДЭА]
- Written by katolik-gomel.by
- Published in Навіны - Гомель
- Comments (3)
Энтузіясты паказалі, як бы выглядала галоўная плошча горада, калі адбудаваць знішчаныя будынкі.
Адбылася прэзентацыя праекта «Пошукі старога Гомеля», у рамках якога былі адноўлены ў 3D будынкі, якія знаходзіліся раней на галоўнай плошчы горада. Гэта будынкі каталіцкай святыні Ўнебаўзяцця Найсвяцейшай Панны Марыі, якая была разбурана бальшавікамі ў 1940 годзе, і пажарнага дэпо з каланчой, якое знеслі ў 1960-х гадах.
Па звестках гісторыкаў, касцёл быў пабудаваны па праекце ангельскага архітэктара Джона Кларка ў 1818 годзе па замове Мікалая Румянцава ў стылі класіцызму. За аснову гомельскага храма быў узяты рымскі Пантэон. У 1938-м бальшавікі зачынілі касцёл, а праз два гады яго ўзарвалі. Як гаворыць гарадская легенда, дом, які пазней пабудавалі з касцёльнай цэглы, першым пацярпеў пры бамбёжцы падчас Другой сусветнай вайны.
Група гомельскіх краязнаўцаў-валанцёраў рэалізавала ідэю аб стварэнні фільму аб выглядзе гістарычнага цэнтру горада. Праектам займаюцца гісторык Марыя Булавінская, краязнаўца і архітэктар Сяргей Ляпін ды іншыя аматары мінуўшчыны. У прыватнасці студэнт-архітэктар Раман Рошчанка - адмыслоўца па архітэктурнаму мадэляванню - займаўся асноўнай тэхнічнай працай, робіць 3D-мадэлі будынкаў. Крыніцы, якімі карысталіся аўтары, - дарэвалюцыйныя фотаздымкі, аэрафотаздымкі, таксама краязнаўцы кансультаваліся з даследчыкамі.
- У фільме мы паказалі, як бы Гомель мог выглядаць, калі ўзнавіць некаторыя гістарычныя аб'екты, - гаворыць Марыя Булавінская. Фільм ужо выкладзены ў інтэрнэт.
Нагадаем, касцёл Унебаўзяцця Найсвяцейшай Панны Марыі стаяў у Гомелі на цэнтральнай плошчы да 1940 году. Згодна са старымі фотаздымкамі, спачатку на касцёле было напісана па-лацінску «Sit nomen Domini benedictum usque ad aeternum» («Хай будзе імя Гасподняе дабраславёным навекі вечныя»). А потым надпіс змянілі на польскі «Chwalcie Pana wszystkie narody» («Хваліце Госпада ўсе народы»). З дапамогай супастаўлення савецкіх і нямецкіх аэраздымкаў аўтары фільма змаглі высветліць дакладнае месцазнаходжанне касцёла - раней яно было невядома толькі прыблізна. Святыня стаяла там, дзе зараз знаходзіцца пляцоўка перад уваходам у цяперашні Галоўпаштамт.
Related items
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная
- Адпраўка ў войска ў Беларусі адбываецца з удзелам святароў
- Пацалунак пад абразом і цягнік з адным вагонам – чым дзеліцца парафія ў глыбінцы
- З 7 дзецьмі пасля 25 сутак вядомы прапаведнік пакінуў Беларусь
RSS-стужка каментароў гэтага запiсу