Упершыню ў Гомелі прайшло моладзевае свята «Андрэйкі» [ФОТА]

Першая сустрэча Душпастырства каталіцкай моладзі Гомеля прайшла ў суботу, 28 лістапада, у Доме міласэрнасці сясцёр Маці Тэрэзы. У гэты дзень тут упершыню святкавалі «Андрэйкі» - у католікаў гэта традыцыйнае вясёлае мерапрыемства перад пачаткам Адвэнту (Каляднага «посту»). У праграму сустрэчы ўваходзілі песні, гульні, знаёмствы, стасункі, абед, а таксама малітва і гутаркі на духоўныя тэмы. Напрыклад, моладзь разважала на тэму віртуальных і рэальных стасункаў у пошуках адказу, як дасягнуць паўнаты ў зносінах і ў жыцці ў цэлым. Праграму сустрэчы падрыхтавалі парафіяльныя скаўты. На свята сабралася моладзь не толькі з Гомеля, але і са Светлагорску, Нараўлянскага раёну.

«Андрэйкі» - гэта феерверк чаканых многімі людзьмі забаваў, гульняў і весялосці з нагоды літургічнага ўспаміну св. Апостала Андрэя (30 лістапада). Гэта адно з тых народных святаў, у якім так моцна перапляліся хрысціянства з фальклорам. «Андрэйкі» звычайна масавага адзначаюць у каталіцкіх мясцовасцях, а цяпер гэтую традыцыю паспрабуюць вярнуць і ў Гомель, дзе гістарычна таксама было шмат католікаў, але за 70 гадоў савецкага атэізму і рэпрэсій супольнасць была практычна знішчана.

Нагадаем, у гомельскім касцёле ствараецца Душпастырства моладзі. У яго рамках будуць створаны групы старшакласнікаў, студэнтаў і працоўнай моладзі. У кожнай групы свае інтарэсы, патрэбнасці і занятасць. Каб лепш арганізаваць сустрэчы, моладзі прапануюць запоўніць анкеты з указаннем сваіх дадзеных, кантактаў і ўзросту, часу заняткаў ці працы. Анкеты знаходзяцца на першым паверсе касцёла.

Душпастырства моладзі і свята «Андрэйкі» арганізуе новы гомельскі святар - адміністратар парафіі Ўнебаўзяцця Найсвяцейшай Панны Марыі айцец Андрэй Шут (shutandrew@gmail.com).