Увядзенне абавязковага водпуску для бацькаў можа быць прасоўваннем гендэрнай ідэалогіі

Магчымасць увядзення ў Беларусі 10-тыднёвага абавязковага сацыяльнага водпуску для бацькаў пры нараджэнні дзіцяці пракаментавалі спецыялісты, якія працуюць з бацькамі ў Гомелі. Нагадаем, прапрацоўка пытання аб мэтазгоднасці ўвядзення абавязковага бацькоўскага водпуску прадугледжана падпраграмай «Сям'я і дзяцінства» Дзяржаўнай праграмы Беларусі «Здароўе народа і дэмаграфічная бяспека» на 2016-2020 гады. У Міністэрстве працы і сацыяльнай абароны, лічаць, што ў грамадстве недаацэньваецца ўдзел мужчын у выхаванні дзяцей, у тым ліку - самімі мужчынамі. Таксама там адзначылі, што ў Міністэрства сталі паступаць запыты ад дэпутатаў з нагоды ўвядзення абавязковага бацькоўскага водпуску.

Старшыня праўлення грамадскага аб'яднання «Савет бацькаў горада Гомеля», кіраўнік праекта «ПапаШкола Гомеля» Сяргей Бычкоў адзначыў, што дзіцяці да трох гадоў псіхалагічна неабходна, каб з ім побач была маці:

- Тата ў гэты час выступае як падмурак і платформа для нармальнага функцыянавання сям'і. Тата, сыходзячы ў дэкрэт, замяшчае ў ім маму, у выніку жанчына не рэалізуецца як маці, а бацька не рэалізуецца як мужчына, кіраўнік і карміцель сям'і, ад гэтага пакутуюць усе і ў першую чаргу дзіця, бо такое змяненне ў сямейнай сістэме адаб'ецца на ім у першую чаргу. У нейкіх асаблівых выпадках гэта магчыма, але абавязваць гэта рабіць - наносіць шкоду сям'і.

Кіраўнік праекта «ПапаШкола Гомеля», які кіруецца ў сваёй дзейнасці хрысціянскімі прынцыпамі, упэўнены, што такія ідэі прасоўваюць з заходняй Еўропы, разбураючы сем'і:

- Практычна не сумняваюся, што за тымі, хто гэта прапаноўвае, стаяць заходнія фонды і арганізацыі, якія прапагандуюць так званую гендэрную роўнасць і свабоду сэкс-меншасцяў.

Такога ж меркавання прытрымліваецца яшчэ адзін дасведчаны спецыяліст, гомельскі сямейны псіхолаг Марыян Голуб:

- Я вывучаў гэтую частку дзяржпраграмы «Сям'я і дзяцінства», і лічу, што гэта можа быць прасоўваннем гендэрнай ідэалогіі. Менавіта так усё пачыналася ў Швецыі: з абвяшчэння роўнасці мужчын і жанчын, дэкрэтных для бацькаў. Само па сабе гэта не дрэнна, але ідэя роўнасці перавернута ў гендэрнай ідэалогіі, укараненне якой прыводзіць да таго, што дзецям прапануюць выбраць сабе пол, прапагандуюцца аднаполыя шлюбы і свабода сэкс-меншасцяў.

Псіхолаг дадаў, што добра, калі мужчына сам прымае рашэнне дапамагаць жонцы пасля родаў:

- У маёй практыцы былі выпадкі, калі мужчына загадзя дамаўляўся на працы аб прадастаўленні невялікага адпачынку і дапамагаў даглядаць за немаўлём. Але гэта павінна быць асабістае рашэнне кожнага, а не абавязковы бацькоўскі адпачынак.