Праз год пасля знаёмства Сяргей і Анастасія ўзялі шлюб у касцёле [фота]

24 жніўня ў гомельскай рыма-каталіцкай царкве адбылося чарговае вянчанне - ўступілі ў шлюб Сяргей і Анастасія Барткевіч. Сяргей - даўні вернік касцёла, а цяпер прывёў у храм і сваю жонку. Пазнаёмілася пара каля года таму і зараз вырашыла абвянчацца і даць перад Богам клятвы вечнай вернасці.

Пасля здзяйснення сакрамэнту пробашч парафіі айцец Славамір пажадаў сужэнцам самага галоўнага - стаць сябрамі Ісуса Хрыста:

- Бо толькі Ён дае сапраўдную любоў, якая доўгацярплівая, ласкавая, не зайздросціць, не пыхлівая, не ганарыцца, не бессаромная, не шукае свайго, не гневаецца, не памятае зла, не радуецца несправядлівасці, але радуецца разам з праўдай, усё зносіць, усяму верыць, на ўсё спадзяецца, усё церпіць - як пісаў апостал Павел.

Ад усяго сэрца віншуем Сяргея і Анастасію і молімся да Госпада з просьбай дабраславіць іх шлюб!