Францыя абыграла Беларусь - гомельскія каталікі балелі на стадыёне (ФОТА гульні)

На гомельскім стадыёне 10 верасня прайшоў кваліфікацыйны матч Чэмпіянату свету па футболе нацыянальных зборных Беларусі і Францыі. Падтрымаць родную каманду прыйшлі многія парафіяне гомельскай рыма-каталіцкай царквы, а таксама пробашч айцец Славамір Ласкоўскі.

Стадыён быў літаральна перапоўнены, і гледачы не расчараваліся ў тым, што прыйшлі на матч. На працягу ўсёй гульні захоўвалася напружанне, Беларусь двойчы вяла ў ліку, але не здолела ўтрымаць перавагу. Амаль увесь матч на полі правёў лепшы футбаліст Еўропы 2012/2013 года Франк Рыберы, які аформіў дубль, у тым ліку забіўшы гол з пенальці. Выніковы лік - 4-2 на карысць Францыі.

Зборная Беларусі займае апошняе месца ў турнірнай табліцы і правядзе апошнюю гульню на выездзе ў Іспаніі.