«Жыццё без Бога не мае сэнсу». Католікі сустрэлі Раство [фота]

У гомельскай рымска-каталіцкай парафіі першая ўрачыстая Калядная святая Імша прайшла ў ноч на 25 снежня. Сотні вернікаў і гасцей, многія сем'і з маленькімі дзецьмі, сабраліся ў касцёле, дзе апоўначы пачалася святочная служба, якую ўзначаліў біскуп Казімір Велікаселец. Ён заклікаў ніколі не аддаляцца ад Бога, бо толькі ён - сапраўднае Святло і толькі ў Ім - сэнс жыцця чалавека:

- Не паддавайцеся падману д'ябла, які схіляе да таго, каб клапаціцца толькі аб матэрыяльным. Усе яно мёртвае, вельмі хутка знікае, мінае, як і наша жыццё. І яно бессэнсоўнае, калі працякае без Бога, які прыйшоў у наш свет, прыняў наша цела дзеля таго, каб нас збавіць, падарыць нам вечнае жыццё.

Пробашч парафіі кс. Юрый Варанко пажадаў кожнаму асабіста сустрэцца з Езусам Хрыстом, убачыць Яго святло, якое перамагае любую цемру:

- Самая галоўная чалавечая мудрасць заключаецца ў імкненні знайсці Бога, дазволіць Яму дзейнічаць у сваім жыцці, - нагадаў святар.

Пасля службы парафіяльны хор выступіў у Каляднымі спевамі, а каля храма традыцыйна зладзілі феерверк.

Удзень 25 снежня святая Імша пройдзе таксама ў 9.00, 12.00 і 17.00. 26 снежня, каб не згубіць радасць ад нараджэння Збавіцеля, вернікаў запрашаць да ўдзелу ў службах у 8.00 і 19.00.

У сераду 27 снежня, у 19.30, у касцёле пройдзе традыцыйны бясплатны Калядны канцэрт класічнай музыкі.

А ў нядзелю, 31 снежня, на дзень Святой сям'і, пасля Імшы на 12 гадзін дзеці пакажуць "Бэтлеемку" - невялікі Калядны спектакль.