У Гомелі пройдзе малітва супраць антысемітызму і нацызму

Гомельская Габрэйская Месіянская супольнасць 5 красавіка ладзіць малітву супраць антысемітызму і нацызму. Традыцыйна такую малітву штогод праводзяць Месіяне ва ўсім свеце. Далучыцца да акцыі Гомельская Габрэйская Месіянская супольнасць запрашае ўсіх мясцовых прадстаўнікоў хрысціянскіх канфесій. Малітва адбудзецца ў 17.00 у актавай зале гатэля "Кастрычніцкі". У мерапрыемстве будуць удзельнічаць госці з Мінскай і Магілёўскай месіянскіх суполак.

Мэта гэтага глабальнага мерапрыемства - аб'яднаць галасы хрысціян розных канфесій і дэнамінацый па ўсім свеце, каб нанесці духоўны ўдар па антысемітызму і нацызму. Адны з тэмаў малітвы гэтага года - за руйнаванне цвярдыняў антысемітызму і нацызму ў горадзе, у краіне, за мясцовыя цэрквы: каб прыходзіла яснае разуменне ролі габрэйскага народа ў Божым плане збаўлення чалавецтва.

Гомельскія каталікі таксама ў гэты дзень будуць маліцца ў дадзенай інтэнцыі на святой Імшы.

- Антысемітызм, як з'ява, вельмі распаўсюджаны і ў нашы дні, прычым, завуалявана. Чалавек, нацыя, народ, жывучы, можа нават і не падазраваць пра яго існаванне, жыць у ім, дзейнічаць па яго законах і правілах, - кажа прадстаўнік Гомельскай Габрэйскай Месіянскай супольнасці Аляксей Ягіпцаў. - Наша сучасная гісторыя таксама прасякнута нянавісцю як да габрэяў, так і да хрысціянаў. Мільёны людзей былі спаленыя ў газавых камерах нацысцкіх лагераў. Тысячы людзей і да сённяшняга дня адчуваюць маральны ціск ад грамадства па прычыне прыналежнасці да габрэйскага народу.

Месіянскі юдаізм - гэта рэлігійны кірунак у юдаізме, паслядоўнікі якога вераць, што Ісус Хрыстос з'яўляецца габрэйскім Месіяй і Збаўцам ўсяго чалавецтва, прыход якога быў абяцаны прарокамі Старога Запавету.