Запіс у Нядзельную школу распачаты ў гомельскім касцёле

У гомельскай рыма-каталіцкай царкве пачаўся запіс на заняткі ў Нядзельнай школе (ФОТА), дзе ў духу любові, без строгіх патрабаванняў і складаных правілаў дзяцей у даступнай гульнявой форме вучаць асновам хрысціянскай веры. Хлопцы і дзяўчаты малююць, спяваюць, рыхтуюць тэатральныя сцэнкі. Адна з груп дзяцей пачне падрыхтоўку да прыняцця Першай Камуніі.

З дзецьмі традыцыйна займаюцца Сёстры Місіянеркі Любові (сёстры Маці Тэрэзы). Цікава, што пра магчымасць наведвання Нядзельнай школы пробашча часам просяць не толькі бацькі-каталікі, але і прадстаўнікі іншых канфесій.

- У Нядзельнай школе вучаць таксама пачынаць самастойныя адносіны з Ісусам - бо Ён самы лепшы сябар, які ніколі не падвядзе, заўсёды выслухае і зразумее, - кажа айцец Славамір. - Тады, крыху пасталеўшы, дзеці змогуць самі маліцца і ісці ў храм нават у тыя моманты, калі гэтага па нейкіх прычынах не робяць бацькі.

А пакуль святар заклікае бацькоў не дзівіцца таму, што некаторыя дзеці з неахвотай ходзяць у Нядзельную школу. Бо яны ва ўсім пакуль бяруць прыклад з мамы і таты. Калі бацькі не хочуць ісці ў царкву, яны не могуць патрабаваць гэтага ад дзяцей.

Нядзельная школа працуе ў гомельскім касцёле ўжо больш 20 гадоў. Для маленькіх дзяцей, якім яшчэ рана ісці ў Нядзельную школу, у Доме міласэрнасці будуць ладзіць заняткі па праграме «Добры пастыр». Іх таксама будуць праводзіць па суботах і нядзелях сёстры Маці Тэрэзы.

Запіс на заняткі вядзецца пасля святой Імшы.