Гэтай скульптуры з дрэва 250 гадоў! Паглядзіце, як аднавілі знойдзеную ў Беларусі фігуру Хрыста

Пра тое, што ў вёсцы Несутычы Навагрудскага раёна выпадкова знайшлі каштоўную фігуру укрыжаванага Езуса Хрыста, шырока паведамляла прэса. Зараз Katolik.life стала вядома, што рэстаўрацыя фігуры, меркавана, канца XVIII стагоддзя завершана. Пра гэта паведаміла архітэктар-рэстаўратар Юлія Шэстак і апублікавала фота.

Пасля заканчэння рамонтных работ у капліцы ў вёсцы Несутычы, дзе яна і была знойдзена, фігуру вернуць на ранейшае месца. Ужо больш за два стагоддзі капліца з'яўляецца месцам малітвы як каталіцкіх, так і праваслаўных мясцовых жыхароў. Яны распавядалі, што пры ўстанаўленні савецкай улады капліцу хацелі знесці трактарам — але не атрымалася. Перажыла яна і Другую сусветную вайну.

Менавіта праваслаўныя мясцовыя жыхары, праяўляючы народную пабожнасць, упрыгожвалі распяцце рушнікамі, не ведаючы дакладна пра яго культурную каштоўнасць. Спецыялісты ж высветлілі, што ўзрост фігуры — каля 250 гадоў, выраблена яна з грушы, верагодна, у Італіі або Прусіі. Фігура цудам цалкам захавалася ў паўразбуранай капліцы.

Гэта адзін з рэдкіх прыкладаў такога віду мастацтва таго часу, выкананы на еўрапейскім узроўні. Рэстаўрацыйнымі работамі кіруе пробашч навагрудскай рыма-каталіцкай парафіі Святога Арханела Міхала ксёндз Юрый Жэгарын.

Наш канал в Telegram – только важное. Подписаться >