Айцец Юхневіч даказвае невінаватасць і абскарджвае прысуд, які ён прыняў як Божае дабраславенне

Прайшло два тыдні з моманту вынясення прысуду каталіцкаму святару Анджэю Юхневічу, былому пробашчу санктуарыя ў Шуміліне. Але на сайце суда і на іншых афіцыйных рэсурсах дагэтуль не з'явілася ніякай інфармацыі пра прысуд.

Такім чынам, якіх-небудзь доказаў віны айца Анджэя, асуджанага да 13 гадоў зняволення, ні суд, ні пракуратура пакуль не прадставілі грамадскасці. Як і ў выпадку з іншым асуджаным святаром – ксяндзом Генрыхам Акалатовічам. Яго прысуд ужо ўступіў у сілу, але ніякай інфармацыі пра яго так і не апублікавалі.

Тым часам вернікі даведаліся, як айцец Анджэй успрыняў свой прысуд і чаго чакаць далей.

Як і на працягу ўсяго суда, святар захоўвае сілу духу, а дзень прысуду лічыць для сябе блаславёным Божым днём. Як нявінна асуджаны, ён па-хрысціянску прыняў гэты прысуд – як Божае дабраславенне.

Святар не падае духам, а наадварот імкнецца падтрымліваць тых, хто перажывае за яго.

Вернікі даведаліся, што айцец Анджэй па-ранейшаму спрабуе даказаць сваю невінаватасць і цяпер абскарджвае рашэнне суда. Гэта доўгі працэс, які можа расцягнуцца на некалькі месяцаў. У гэты час святар будзе заставацца ў СІЗА Віцебска, куды яму можна напісаць ліст па адрасе:

Юхневичу Анджею Марьяновичу
210026, ул. Гагарина 2, СИЗО-2, Витебск

Наколькі вядома вернікам, у матэрыялах справы і ў боку абароны ёсць шмат фактаў, якія могуць казаць пра сфабрыкаванасць справы. Але абнародваць іх нельга, паколькі той, хто гэта зробіць, сам можа трапіць пад крымінальны пераслед – суд праходзіў у закрытым рэжыме, а ад адвакатаў запатрабавалі падпіску аб неразгалошванні.

Пра меркаваных ахвяраў, якія выступілі з абвінавачваннямі праз шмат гадоў пасля нібыта ўчыненых злачынстваў, па-ранейшаму ніякіх звестак няма.

Наш канал в Telegram – только интересное и важное. Подписаться >