Дзень нараджэння ў зняволенні адзначыў каталіцкі святар у Беларусі

Чэрвень 18, 2026
Written by KATOLIK.LIFE
Published in Соцыум
Add new comment

Таксама за кратамі ён адзначаў гадавіну святарскага пасвячэння.

Зняволенаму каталіцкаму святару Анатолю Парахневічу споўнілася 66 гадоў. Свой дзень нараджэння ён адзначыў 16 чэрвеня. А перад гэтым, 4 чэрвеня, ён адзначаў 31-ю гадавіну святарскага пасвячэння.

З болей 130 святароў, якія служаць у Мінска-Магілёўскай архідыяцэзіі, ксёндз Анатоль Парахневіч уваходзіць у лік 12 найстарэйшых святароў.

Як мы паведамлялі, пробашча парафіі ў Альковічах Вілейскага раёну арыштавалі ў сярэдзіне сакавіка. Ніякая афіцыйная інфармацыя на гэты конт не публікавалася.

Новых дадзеных пра стан святара і яго справу пакуль няма. Апошнія неафіцыйныя звесткі пра ксяндза Анатоля вернікі атрымлівалі ў пачатку траўня – паведамлялася, што ён адчувае сябе здавальняюча, а інфармацыю пра перажыты за кратамі інфаркт не пацвердзілі. Паводле звестак вернікаў, святара абвінавачваюць у «здрадзе дзяржаве» і ўтрымліваюць у СІЗА КДБ.