Чарнобыльскіх ліквідатараў з Беларусі і Украіны прыме Папа Францішак

20 красавіка Папа Рымскі Францішак прыме на аўдыенцыі ў Ватыкане ліквідатараў аварыі на Чарнобыльскай атамнай станцыі з Беларусі і Украіны. У сустрэчы з Пантыфікам, як чакаецца, прымуць ўдзел каля 50 ліквідатараў.

Пра гэта на прэс-канферэнцыі ў Мінску распавёў Мітрапаліт Мінска-Магілёўскі арцыбіскуп Тадэвуш Кандрусевіч. Іерарх таксама адзначыў, што на аўдыенцыі разам з групай ліквідатараў будуць і іерархі, у ліку якіх будзе і беларускі арцыбіскуп.

Сустрэча Пантыфіка з ліквідатарамі будзе прымеркавана да 30-годдзя з дня аварыі на ЧАЭС.

Папа Рымскі Францішак не ўпершыню звяртае асаблівую ўвагу на пытанні экалогіі і навакольнага асяроддзя.

У сваёй энцыкліцы «Laudato Si», прысвечанай праблемам экалогіі Пантыфік задаецца пытаннем: «Які свет мы хочам перадаць тым, хто прыйдзе пасля нас, дзецям, якія зараз падрастаюць?». Энцыкліка «Laudato Si» — спроба звярнуць увагу вернікаў на гэтае хвалюючае пытанне.

Назва энцыклікі ўзятая з воклічу св. Францішка «Laudato si», mi’ «Signore» («Будзь праслаўлёны, мой Пане!»), які ў «Гімне стварэнню» нагадвае, што зямля з’яўляецца нашым супольным домам.

«Сёння гэта зямля, зняважаная і разрабаваная, плача, а яе стогн злучаецца з енкам усіх пакінутых у свеце» — гаворыцца ў энцыкліцы. Святы Айцец заклікае ўсіх — як кожнага асобнага чалавека, так і сем’і, мясцовыя супольнасці, народы і міжнародную супольнасць да «экалагічнага навяртання». 

Таксама падчас прэс-канферэнцыі Арцыбіскуп Тадэвуш Кандрусевіч сказаў: «Упэўнены, што візіт Папы Францішка ў Беларусь блізкі, чым калікольвек». Арцыпастыр звярнуў увагу на тое, што адносіны ў гэтым накірунку павінны развівацца, у іх не павінен убівацца клін.

«Упэўнены, што візіт Папы бліжэй, чым калікольвек. Мне падаецца, што сёння клімат такі, што ён спрыяе таму, каб Папа прыехаў у Беларусь», — сказаў іерарх.

Паводле слоў арцыпастыра, для афіцыйнага візіту Папы Рымскага ў Беларусь павінны быць выканана шэраг умоў. «Неабходна запрашэнне Прэзідэнта Беларусі, Канферэнцыі Каталіцкіх Біскупаў у Беларусі, а таксама такое нягласнае правіла — згода той канфесіі, вернікі якой складаюць ў краіне большасць. У выпадку з Беларуссю гэта Праваслаўная Царква», — адзначыў арцыбіскуп.

Сatholic.by

Глядзіце таксама: Гадавіна катастрофы на ЧАЭС: рэпартаж з Хойніцкай парафіі і зоны адчужэння [фота]