Кава ад капуцынаў і прысмакі ад «Сaritas» будуць на фэсце ў Будславе

На сёлетніх ўрачыстасцях у Будславе будуць прадстаўлены розныя каталіцкія супольнасці, рухі, арганізацыі. Намёт дабрачыннага каталіцкага таварыства «Сaritas» будзе працаваць пад дэвізам «Смак дабрыні». Гэта значыць, што ў намёце можна будзе не толькі даведацца, што добрага «Сaritas» зрабіў за гэты час, але і адчуць на смак, як соладка рабіць дабро.

Нагадаем, урачыстасці ў Будславе пройдуць 1-2 ліпеня (гл. праграму), а зараз з розных куткоў Беларусі ў Будслаў ідуць пешыя пілігрымкі - онлайн-трансляцыя.

Спецыяльна для ўдзельнікаў урачыстасцяў будуць падрыхтаваны салодкія «прывітанні з Будслава» і яшчэ больш салодкая цукровая вата.

Акрамя таго, тут можна будзе пачаставацца адмысловай гарбатай, знайсці свечку з лагатыпам Года Міласэрнасці ці проста бутэльку вады.

Знайсці намёт будзе нескладана, таму што ў гэтым годзе ён размесціцца побач з намётам братоў капуцынаў, якія шырока вядомыя сваёй адмысловай кавай, без якой не абыходзіцца ўжо каторы будслаўскі фэст. Акрамя кавы, тут будзе прадстаўлены капуцынскі бальзам і асартымент майстэрні «SACRIS VESTIBUS». Таксама браты раскажуць кожнаму жадаючаму пра жыццё супольнасці і дзейнасць у нашай краіне.

Сatholic.by