У Дзень Волі ў беларускім касцёле ў Вільні адбудзецца «Служба памяці»

Арганізатары святкавання Дня волі-2017 у Вільні прадставілі праграму ўрачыстасцяў. Мерапрыемствы адбудуцца цягам двух дзён. 25 сакавiка у 12:00 -12:30 адбудзецца ўшанаванне памяці дзеячаў Беларускай Народнай Рэспублікі на могілках Росы (Rasų g. 32). У 18:00 - 20:00 - святочны канцэрт «Спеўны Сход» («Народны альбом») у Зарачанскай кавярні (Užupio g. 2). А 26 сакавiка ў беларускім касцёле святога Барталамея (Užupio g. 17) у 12.00 адбудзецца «Служба памяці».

Арганізатары святкавання - студэнцкае прадстаўніцтва Еўрапейскага гуманітарнага ўніверсітэта, Моладзевая асацыяцыя «StudAlliance», Беларускі дом правоў чалавека імя Б. Звозскава і Таварыства беларускай культуры ў Літве. Партнёры свята - агенцтва «Vilnius Relax».

Дзень Волі - неафіцыйнае свята, якое адзначаецца 25 сакавіка часткай беларусаў і звязанае з абвяшчэннем у гэты дзень у 1918 годзе незалежнасці Беларускай Народнай Рэспублікі (БНР - першая дзяржава, абвешчаная на тэрыторыі Беларусі).