Дзень роднай мовы: у БДУ прэзентавалі Псалтыр па-беларуску
- Written by Katolik.life
- Published in Царква
- Add new comment
На мерапрыемстве выступілі складальнікі кнігі, сярод якіх - ксендз Уладзіслаў Завальнюк.
Нядаўна на філалагічным факультэце Беларускага дзяржаўнага універсітэта адбылася сустрэча, прысвечаная прэзентацыі перакладу Псалтыра на сучасную беларускую мову. Шмат студэнтаў і выкладчыкаў прыйшло на гэтае мерапрыемства, якое падалося ўсім вельмі цёплым і душэўным. Спачатку некалькі псалмоў з перакладзенай кнігі цудоўна выканала харавая капэла Чырвонага касцёла. Гэтае выступленне так уразіла слухачоў, што іх увага была прыцягнута да кожнага слова на працягу ўсёй сустрэчы, паведамляецца на старонцы філфака ў сацсетцы.
Выступілі, канешне, і вучоныя, якія з’яўляюцца складальнікамі кнігі - доктар філалагічных навук, прафесар Мікалай Прыгодзіч, кандыдат гістарычных навук, магістр тэалогіі Уладзіслаў Завальнюк, настаўніца-беларусазнаўца Валянціна Раманцэвіч. Кожны з іх расказаў пра значнасць перакладу Псалтыра для беларускага народа і для развіцця роднай мовы.
Кс. Уладзіслаў Завальнюк таксама падзяліўся са слухачамі здзяйсненнем яго дзіцячай мары - ён атрымаў пасведчанне лётчыка, а Валянціна Раманцэвіч паведаміла пра сваё падарожжа ў Іерусалім.
Словы падзякі гэтым вучоным і гонару за такое дасягненне выказалі доктар філалагічных навук, прафесар, акадэмік АН Беларусі Аляксандр Лукашанец, літаратуразнаўца, доктар філалагічных навук, прафесар Вячаслаў Рагойша і дэкан філалагічнага факультэта, доктар філалагічных навук, прафесар Іван Роўда. Яны вельмі захоплены развіццём сучаснай беларускай мовы і вераць у яе будучыню, адзначаецца ў паведамленні.
Нагадаем, 21 лютага святкуецца Міжнародны дзень роднай мовы - у гэтым кантэксце навіна пра прэзентацыю беларускамоўнага Псалтыра асабліва радасная! Адзначым, што менавіта «Псалтыр» Францішка Скарыны стаў першай беларускай друкаванай кнігай.
Related items
- Глядзець, чытаць, удзельнічаць: праваслаўная Велікодная служба па-беларуску з анлайн-трансляцыяй пройдзе ў Вільні
- І ў горадзе, і ў вёсцы: фестываль арганнай музыкі пройдзе ў касцёлах Беларусі
- Такі падарунак – толькі ад байкераў. Мотасезон яны адкрылі ў касцёле
- Ці ўступаць у піянеры, спыталі ў вернікаў – частка адказаў здзівіла
- «Пад зямлёй адчула сябе шчаслівай». Беларуска працуе ў шахце і запрашае туды на Імшу