«Радыё Марыя» ў Беларусі не зарэгістравалі з чацвёртага разу і зноў адмовіліся ад дыялогу
- Written by KATOLIK.LIFE
- Published in Царква
- Add new comment
Цяпер перадачы транслююцца праз інтэрнэт, але ў многіх слухачоў няма магчымасці ім карыстацца
У чарговы, ужо пяты раз, каталіцкаму «Радыё Марыя» ў Беларусі адмовілі ў ліцэнзіі СМІ, без якой радыё не можа атрымаць частоты вяшчання і трапіць у радыё-пакет «Белтэлекаму» Zala. Адзіная магчымасць, якая застаецца ў «Радыё Марыя» ў Беларусі - трансляцыя праграм праз інтэрнэт, паведаміла ўдзельнік каманды валанцёраў Яўгенія Найдовіч.
- «Радыё Марыя» ёсць амаль ва ўсіх краінах свету, нават у Кітаі і ў Сірыі. Наша радыё не камерцыйнае, існуе за кошт ахвяраванняў. Працэдура падачы заяўкі на ліцэнзію СМІ ў нашым выпадку звычайна выглядала так: плаціш 27 тыс. рублёў, прыносіш тону паперы, чакаеш месяц. Грошы месяц гуляюць па дзяржаўных рахунках. Месяц Міністэрства інфармацыі маўчыць. У самы апошні дзень дасылаюць адмоўны адказ. Прычына - умоўна, коска не ў тым месцы. Грошы, праўда, вяртаюць (яшчэ тыдні праз тры) разам з тонай тваёй паперы, - распавядае Яўгенія.
Некалькі разоў у выдачы ліцэнзіі адмаўлялі па «размытых прычынах», гаворыць валанцёр. Затым прапаноўвалі падаць заяўку пасля прыняцця новага закона аб СМІ, але і гэта не дапамагло:
- Чацвёрты раз ідзем разам з касцёльнымі ўладамі. Закон прыняты. Мы адпавядаем. Грошы заплацілі. Але не! Вочкі ў падлогу і давай мармытаць штосьці пра "ну вы ж разумееце, пры ўсёй павазе да вас, мы не можам прыняць гэтае рашэнне, выбачайце". Ну што ж. Не хочаце - мы перажывем. Навучым нашых старэнькіх бабуль карыстацца інтэрнет-радыё!
Тыдзень таму каманда «Радыё Марыя» зрабіла яшчэ адну спробу зарэгістравацца - у форме ліста-зварота ад імя ўсіх слухачоў па усёй Беларусі:
- Папрасілі проста даць нам дазвол вяшчаць. Асабліва там, дзе далёка, дзе ёсць частоты і яны не запатрабаваныя. І дазволіць нам гэта за танна, а лепей бясплатна, як сацыяльна-значнаму радыё. Але не, паважаныя, не. Ізноў "пена з мозгу" на пяці аркушах. Мы не існуем. Мы смецце.
Паводле Яўгеніі, узрост вялікай колькасці слухачоў «Радыё Марыя» ў Беларусі - 90+, шмат з іх жыве ў вёсачках, дзе не ловіць інтэрнет:
- Шмат амаль не чуюць, шмат сляпых, каму складана карыстацца смартфонам. У пераважнай большасці няма ўвогуле ані кампутара, ані тэлефона, альбо аплата за інтэрнет па сучасных тарыфах - гэта дорага. Велізарная колькасць слухачоў мае патрэбу наведваць касцёл кожны дзень, але не могуць гэтага рабіць праз старасць, інваліднасць, самотнасць і іншыя немачы. А цяпер, калі здарыўся гэты дурны ковід-19, да касцёлу не могуць хадзіць амаль усе.
Валанцёр гаворыць, што вельмі запатрабаваныя малітвы, якія гучаць на «Радыё Марыя»:
- Спадар Юзаф просіць, каб дарослы сын змог урэшце працаўладкавацца, дзяўчынка моліцца таксама аб працы для таты, спадарыня Ядзвіга перажывае за ўнукаў, каб яны крочылі добрым і сумленным шляхам па жыцці. Старэнькі дзядуля патэлефанаваў, каб памаліцца і павіншаваць свайго адзінага суседа і сябра Яна, якому споўнілася 87 гадоў. А ў спадарыні Алены два сына інваліда...
Яўгенія перакананая, што простыя чалавечыя размовы і перадачы - гэта магчымасць нібыта выходзіць туды, дзе крышачку лягчэй і больш радасна.
Media
Related items
- З паходнямі і ў касцюмах: вуліцамі гарадоў Беларусі правялі Крыжовы шлях
- Месяцовае і сонечнае гало назіралі беларусы ў Вялікі тыдзень
- Аксана, Сяргей, Паліна, Павел... За тых, хто не сустрэне Вялікдзень дома, моляцца ў Вялікі чацвер
- Дзе глядзець відэа-онлайн на Вялікдзень-2024 – падборка прамых трансляцый з касцёлаў
- Набірае папулярнасць канал сельскага святара: для пропаведзі ён рамантуе ГАЗ, «прымае пацыентаў»