BEL
†Бог любіць цябе такім, які ты ёсць! †Хрыстос дабравольна пайшоў на крыж за твае правіны †Смерць пераможана! † Найбольш просты шлях да святасці - не асуджай! †Ісус шукае і чакае цябе! †Хрыстос уваскрос! †Д'ябал не можа зрабіць пекла прывабным, таму ён робіць прывабнай дарогу туды

«Я супраць гвалту, хлусні». Біскуп Касабуцкі пракаментаваў напад на Курыю ў Мінску

Іерарх заклікаў да малітвы за ўсіх, каму найбольш патрэбна Божая ласка, каб вытрымаць у выпрабаваннях

Каталіцкі біскуп Юры Касабуцкі напісаў на сваёй старонцы ў Фэйсбуку, што шматлікія людзі скіравалі да яго словы падтрымкі і салідарнасці пасля інцыдэнту ў ноч на 19 траўня, калі быў здзейснены напад на Курыю Мінска-Магілёўскай архідыяцэзіі. Невядомыя перабраліся праз плот, трапілі на прыватную тэрыторыю, разбілі шкло ў прыпаркаваным аўто, кінулі вазай у дзверы, пашкодзілі дамафон.

Афіцыйныя органы пра гэта пакуль не паведамлялі, а ў сацсетках пачалі выказваць меркаванне, што напад зможа быць здзейснены з-за заявы біскупа Касабуцкага з падтрымкай незалежных журналістаў і партала Tut.by.

- Не варта кагосьці абвінавачваць, пакуль не скончыцца следства. Гэта важна, таму што заўсёды ёсць небяспека абвінаваціць нявіннага чалавека, - напісаў іерарх.

Ён падзякаваў усім за падтрымку і заўважыў:

- Гэта вельмі важна, бо наша людская салідарнасць з'яўляецца праявай чалавечай дасканаласці і здольная рабіць нават цуды... Мяне найбольш кранае тое, што звяртаюцца людзі розных канфесій, нацыянальнасцей, поглядаў і выказваюць сваю падтрымку. У гэтым адзінстве наша моц, бо мы праяўляем сябе як адзіны беларускі народ... Вы - найлепшыя людзі ва ўсім свеце!

Біскуп Касабуцкі адзначыў, што заўсёды падтрымлівае «чалавека церпячага, пераследаванага, якому цяжка»:

- Я малюся і заахвочваю маліцца за ўсіх тых, каму найбольш патрэбна Божая ласка, каб вытрымаць у выпрабаваннях. Я быў, ёсць і буду супраць гвалту, насілля, здзекаў, катаванняў, рэпрэсій і хлусні...

Іерарх папрасіў аб малітве праз заступніцтва благаслаўлёнага Ежы Папялушкі - польскага святара, закатаванага камуністычнымі спецслужбамі.

Дадаць каментарый

Ахоўны код
Абнавіць