Як усміхаецца найстарэйшы іерарх Беларусі? Неафіцыйны рэпартаж з Янава

Апостальскі нунцый арцыбіскуп Антэ Ёзіч 18 траўня ў Іванаве (Янаў Палескі) узначаліў цэлебрацыю ў гонар святога мучаніка Андрэя Баболі. Удзел у ёй узялі рыма-каталіцкія біскупы, Апостальскі адміністратар для грэка-католікаў у Беларусі архімандрыт Сяргей Гаек, святары абедзвюх канфесій.

Перад святой Імшой адбылася традыцыйная працэсія да касцёла ад месца мучаніцтва святога Андрэя Баболі. Сёлетнія ўрачыстасці сталі асаблівымі і сабралі іерархаў дзякуючы юбілеям найстарэйшага каталіцкага біскупа Беларусі Казіміра Велікасельца, якому споўнілася 79 гадоў. Сёлета ён, дапаможны біскуп Пінскай дыяцэзіі, адзначае 40-годдзе святарства і 25-годдзе біскупскага служэння.

Прапануем увазе невялікі фота- і відэарэпартаж з урачыстасці, які мы склалі са сторыс у Instagram пінскай парафіі. Здымкі атрымаліся вельмі цёплымі: на іх можна ўбачыць, як радасна ўсміхаецца біскуп Казімір, а таксама Пінскі ардынарый Антоні Дзям'янка, якіх вернікі прывыклі бачыць сур'ёзнымі і строгімі, як на духавенства «глядзіць» помнік ваяўнічаму атэісту Леніну, як проста і сціпла паводзіць сябе прадстаўнік Папы Рымскага.