Новы біскуп пасвечаны ў Беларусі: «Просім міра ў Бога»

Біскупскае пасвячэнне прыняў 7 верасня Андрэй Зноска, якога Папа Рымскі прызначыў дапаможным біскупам Пінскай дыяцэзіі. Урачыстасць у пінскім катэдральным касцёле ўзначаліў Апостальскі нунцый арцыбіскуп Антэ Ёзіч пры ўдзеле беларускіх біскупаў, рыма-каталіцкага і грэка-каталіцкага духавенства.

Трансляцыя ўрачыстай святой Імшы вялася на старонцы пінскай парафіі ў Instagram. Пасля Эўхарыстыі біскуп Андрэй Зноска звярнуўся са словамі падзякі да ўсіх прысутных, у тым ліку – прадстаўнікоў дыпламатычнага корпуса і адзначыў:

«Няхай добры Бог адорыць нас усіх благаслаўленнем міру. Просім міра ў Бога. Няхай Ён умацоўвае добрасуседства паміж нашымі народамі».

Звяртаючыся да прадстаўнікоў дзяржаўнай улады, біскуп выразіў надзею на канструктыўнае супрацоўніцтва.

Апостальскі нунцый у сваю чаргу нагадаў, што завяршае сваю місію ў Беларусі, на развітанне падзякаваў усім біскупам і святарам, запэўніў, што «палюбіў гэты народ», а біскупу Андрэю пажадаў «прымаць і разумець людзей, якіх даў Бог», заўважыў, «самае галоўнае для біскупа – любоў да народа».

Біскуп Андрэй Зноска адгэтуль будзе жыць у Пінску. Нагадаем, ён нарадзіўся і служыў святаром на Гродзеншчыне.

Наш канал в Telegram – только интересное и важное. Подписаться >