Нецікавыя ці не цікавяцца? Пра што гаворыць статыстыка каталіцкіх медыя Беларусі

Каб ацаніць, наколькі каталіцкія вернікі Беларусі цікавяцца тым, што адбываецца ў мясцовым і паўсюдным Касцёле, мы паглядзелі некаторую статыстыку каталіцкіх медыя. Вынікі ўзнялі дыскусійнае пытанне: ці вернікі мала цікавяцца жыццём Касцёла, ці навіны ў медыях – нецікавыя?

Нагадаем, у Беларусі звыш 1 мільёна католікаў. Пры гэтым колькасць падпісчыкаў галоўнага каталіцкага медыя Catholicby у Telegram (цяпер гэты мэсэнджэр – адна з асноўных крыніц аператыўных навін) – меней за 3,5 тысяч чалавек. А прагляды публікацый дасягаюць, у сярэднім, 1,7 тыс. Гэта значыць, ад 0,1 да 0,2% ад колькасці вернікаў.

Разлікі, канешне, прыкладныя, бо дакладнай статыстыкі няма, тым больш трэба браць пад увагу ўзроставы фактар і наяўнасць тых, хто ўвогуле не карыстаецца мэсэнджэрам.

Але ў цэлым лічбы могуць сведчыць пра сітуацыю. У іншых каталіцкіх медыя ў Telegram паказчыкі яшчэ больш сціплыя. 760 падпісчыкаў у Radiomariabelarus і 300-500 праглядаў публікацый. Прыкладна столькі ж праглядаў у канала Katolik.l***, ад якога вымушаны былі адпісацца каля 200 чалавек пасля таго, як канал унеслі ў спіс «экстрэмісцкіх матэрыялаў».

Віцебскі «Каталіцкі веснік» не мае каналу ў Telegram, а вось у галоўнага каталіцкага рэсурса Гродзенскай вобласці, дзе жывуць звыш 500 тыс. католікаў, Grodnensis – толькі 530 падпісчыкаў – зноў тыя самыя 0,1%. На пятым месцы – канал галоўнага ватыканскага медыя для Беларусі Vaticannewsbe, які мае 260 падпісчыкаў.

Аднак нашмат лепшая сітуацыя ў Instagram, дзе на каталіцкія медыя падпісаны ў разы больш вернікаў.

І не толькі медыя. Старонкі многіх парафій маюць тысячы падпісчыкаў (напрыклад, лідскай і будслаўскай – звыш 4 тысяч) – нашмат больш, чым каналы медыя ў Telegram.

Можна зрабіць выснову, што вернікі больш цікавяцца жыццём менавіта парафій – сваіх і, магчыма, суседніх, любяць праглядаць фота і відэа з рэлігійных падзей, але праяўляюць мала цікавасці непасрэдна да навінаў Касцёла.

У той жа час уцягнутасць католікаў у інфармацыйнае поле Касцёла, заангажаванасць яго жыццём, у разы большая, чым зацікаўленасць праваслаўных вернікаў да падзей у сваёй Царкве.

Telegram-канал галоўнага партала БПЦ мае меней за 1,5 тысяч падпісчыкаў пры афіцыйнай колькасці праваслаўных вернікаў у Беларусі звыш 4 мільёнаў чалавек. А Telegram-канал, напрыклад, Гомельскай епархіі, адной з найбуйнейшых у Беларусі, мае толькі 420 падпісчыкаў.

Наш канал в Telegram – только интересное и важное. Подписаться >