Метастазы ў лёгкіх: арцыбіскуп Кандрусевіч сам паведаміў пра свой стан

Арцыбіскуп эмэрыт Тадэвуш Кандрусевіч звярнуўся да вернікаў праз канал Catolic.by на YouTube, каб паведаміць пра стан свайго здароўя і падзякаваць за малітву.

Напярэдадні паведамлялася, што заслужаны іерарх праходзіць хіміятэрапію.

Арцыбіскуп паведаміў, што два гады таму ў яго знайшлі рак, меланому, пасля гэтага была зроблена аперацыя. Затым іерарх перыядычна праходзіў абследванне.

«Усё было добра, але два тыдні таму падчас кантрольнай праверкі выявілася, што ў мяне ёсць метастазы, якія пайшлі на лёгкія. Я не адчуваю гэтага, але факт ёсць фактам», – сказаў арцыбіскуп.

Ён падзякаваў усім за малітвы і нагадаў, што вернікі перажываюць цяпер Вялікі пост, падчас якога суперажываюць Езусу, які цярпеў за нас і нашыя грахі:

«Мы павінны ахвяроўваць нашы цярпенні за наша навяртанне [да Бога], за поспех людзей у іх духоўным адраджэнні, а таксама за нашу краіну».

Заслужаны іерарх пажадаў усім здароўя душы і цела.

Наш канал в Telegram – только интересное и важное. Подписаться >