Першыя пілігрымкі выйшлі ў Будслаў: 9 дзён пешшу ў любое надвор'е

Першыя пешыя паломніцтвы выйшлі 26 чэрвеня ў каталіцкі Нацыянальны санктуарый у Будславе. Традыцыйна – гэта самая працяглая пілігрымка з Баранавічаў, а таксама – з Ліды. Удзельнікі будуць ісці 9 дзён і прыбудуць да цудатворнага абраза Божай Маці 4 ліпеня – на фэст у Будславе.

Пілігрымаў у Баранавічах благаславіў біскуп Пінскі Антоній Дзям'янка. Адтуль выйшла некалькі дзясяткаў чалавек. У шляху да пілігрымкі далучаюцца ўдзельнікі – з Івянца, Ракава, Радашковічаў, іншых мясцінаў.

У сторыс на старонцы пілігрымкі можна пакінуць сваю просьбу, аб якой будзе маліцца паломніцтва ў дарозе.

Неўзабаве ў Будслаў выйдуць пілігрымы з Віцебска, Мінска, Нарачы, Смаргоні і іншых месцаў – усяго каля 2 тысяч вернікаў у складзе звыш 20 пешых і роварных пілігрымак штогод накіроўваюцца на фэст Маці Божай Будслаўскай.

Дарэчы, сёлета споўнілася 35 гадоў, як аднавіліся пілігрымкі ў Будслаў – гэта адбылося ў 1990 годзе. З таго часу паломніцтвы ў Нацыянальны санктуарый ідуць з розных куткоў Беларусі.