Пілігрымы прыбылі ў Будслаў, пачынаецца фэст – трансляцыя

Ліпень 4, 2025
Written by KATOLIK.LIFE
Published in Царква
Add new comment

Упершыню галоўны каталіцкі партал Беларусі не ладзіць прамую трансляцыю.

Пілігрымы з усёй Беларусі прыбываюць у каталіцкі Нацыянальны санктуарый у Будславе, дзе 4 ліпеня пачынаецца фэст у гонар старадаўняга цудатворнага абраза Маці Божай Будслаўскай.

Чакаецца, што ў пешых і роварных пілігрымках на свята прыбудуць каля 2 тысяч вернікаў, яшчэ некалькі тысяч прыедуць аўтобусамі і на ўласных аўто.

Упершыню за апошнія гады онлайн-трансляцыя асноўных мерапрыемстваў фэста адбываецца толькі на канале Нацыянальнага санктуарыя. Раней штогод трансляцыю ладзіў Catholic.by. Як мы распавядалі, галоўны каталіцкі партал Беларусі спыніў паўнавартасную працу. Неафіцыйна гэта тлумачылі праблемай з кадрамі, аднак відавочна, што існуе і праблема з фінансаваннем.

Запланаваны жывы эфір на тэлебачанні, але толькі адной падзеі – галоўнай святой Імшы ў суботу ў 11.30 на канале «Беларусь 3». У YouTube гэты канал не праводзіць жывы эфір. Трансляцыя ёсць толькі на сайце канала, але яна не стабільная.