Пакаянне за Беларусь і пілігрымка да Каралевы Беларусі: дзве важныя падзеі на захадзе і ўсходзе

Беларускія католікі 5-7 верасня праводзяць два важныя мерапрыемствы. У Навагрудку гэтымі днямі праходзяць рэкалекцыі пакаяння за Беларусь – ужо трэці раз гэтыя штогадовыя асаблівыя духоўныя практыкаванні яднаюць духавенства і свецкіх. Мерапрыемствы першага дня прайшлі з удзелам біскупа Віцебскага Алега Буткевіча.

Цэнтральнай падзеяй стаў вячэрні Крыжовы шлях па вуліцах Навагрудка. Мужчыны неслі вялікі крыж, дзеці – паходні.

Таксама ў праграме – усяночныя адарацыі, пілігрымка пакаяння. Мэта гэтых і іншых набажэнстваў – уміласціўленне Богу за асабістыя грахі і ўсяго народа.

А ва ўсходняй частцы Беларусі 6-7 верасня праходзіць пілігрымка з Магілёва ў Бялынічы. У гэтым мястэчку здаўна знаходзіўся цудатворны абраз, які атрымаў тытул Каралевы Беларусі.

Да гэтага абраза Божай Маці пілігрымка з Магілёва, у якую запрасілі вернікаў з усёй краіны, праходзіць ужо 10-ы раз. Пешае паломніцтва стартавала з катэдральнага касцёла Магілёва пасля святой Імшы, якую адправіў біскуп Аляксандр Яшэўскі.