Раство набліжаецца: здзіві Бога і людзей сваёй міласэрнасцю!

У гомельскай рымска-каталіцкай царкве прайшлі адвэнтовыя рэкалекцыі. Каб лепш падрыхтавацца да свята Нараджэння Хрыстовага, рэкалекцыі для гомельскіх католікаў правёў цяперашні пробашч парафіі святога Антонія Падуанскага ў Рагачове айцец Алег Грыгаровіч з ордэна айцоў паллацінцаў, выпускнік варшаўскага і ватыканскага універсітэтаў.

Цэнтральнай тэмай духоўных практыкаванняў стала паняцце «міласэрнасць», бо ў Каталіцкай царкве нядаўна пачаўся Год міласэрнасці. Святар патлумачыў, што значыць міласэрнасць Бога, распавёў, як Гасподзь ставіцца да кожнага чалавека.

- Бог не лічыць цябе нейкім «нулём без палачкі», а наадварот заўсёды надае табе вартасці, - адзначыў айцец Алег.

Паводле яго слоў, Гасподзь заўсёды схіляецца над чалавекам пры яго нават самых жудасных падзеннях і ніколі не асуджае яго. Бог гаворыць: «Ты зможаш падняцца, я дапамагу табе!»

Гасподзь хоча, каб так жа і мы ставіліся да іншых людзей:

- Здзіві Бога і людзей сваёй міласэрнасцю! Палюбі таго, хто не любіць цябе! Будзь міласэрным, як Айцец!