У гомельскіх хоспісах каталіцкая моладзь паказала Калядны спектакль

Па традыцыі, штогод да 7 студзеня, калі праваслаўныя адзначаюць Божае Нараджэнне, моладзь гомельскай рыма-каталіцкай парафіі наведвае сацыяльныя ўстановы, у якіх дажываюць свой век адзінокія хворыя пажылыя людзі. Прынесці ім святочны настрой каталіцкая моладзь стараецца праз Калядныя спектаклі, якія ставіць разам з сёстрамі ордэна Маці Тэрэзы.

Цёплыя сустрэчы напярэдадні Божага Нараджэння праходзяць у шпіталі сястрынскага догляду ў Старых Дзятлавічах і аддзяленні сястрынскага догляду Улукаўскай участковай лякарні.

З дапамогай спектакляў веруючыя маладыя людзі распавядаюць гледачам пра Раство, пра сэнс гэтай падзеі і пра тое, як Прыход Збавіцеля ў свет тычыцца кожнага, чаму свята актуальнае ва ўсе часы, у тым ліку цяпер, праз больш за 2000 гадоў.