«Дзякуй Богу!» – першая рэакцыя беларусаў на вызваленне вязняў

З беларускіх калоній 3 ліпеня былі вызвалены па амністыі пяць чалавек, справы якіх называюць палітычна матываванымі. Сярод іх, папярэдне, – адзін каталіцкі вернік. Усе імёны пакуль не агалошваюцца [будзе абноўлена], але дакладна вядома пра аднаго вызваленага вязня – гэта 67-гадовы Рыгор Кастусёў, які быў асуджаны на 10 гадоў, мае анкалогію, знаходзіўся за кратамі звыш трох гадоў, часта ў самых жорсткіх умовах – штрафным ізалятары.

Пра вызваленне вязня паведаміў у Фэйсбуку ягоны сваяк, напісаўшы толькі адну фразу: «Дзякуй Богу!» Яшчэ некалькі чалавек у каментарах паўтарылі тое самае: «Дзякуй Богу».

Нагадаем, на мінулым тыдні пры ўдзеле Ватыкана былі вызвалены ў Беларусі пяць грамадзян Украіны. Святы Пасад і раней дапамагаў у вызваленні зняволеных. Ці мае ён дачыненне да цяперашніх працэсаў, пакуль не гаворыцца. У спісе зняволеных, крымінальныя справы якіх называюць палітычна матываванымі, застаецца звыш 1400 чалавек, сярод іх – каталіцкі святар.

Наш канал в Telegram – только интересное и важное. Подписаться >