Нарэшце: старадаўні касцёл на Віцебшчыне, лёс якога хвалюе грамадскасць, пачалі ратаваць

Ва Ушацкім раёне маюць намер прыступіць да кансервацыі руін каталіцкага храма і кляштара XVIII стагоддзя. Гэта касцёл святой Веранікі ў вёсцы Селішча, якому сёлета спаўняецца 300 гадоў — яго пабудавалі ў 1726 годзе. А таксама — манастырскі корпус бернардынаў. Гэты комплекс – адны з самых вядомых у Беларусі руін, якія папулярныя сярод турыстаў.

Касцёл – помнік архітэктуры позняга барока, 3-нефавая базыліка, і кляштарныя сцены прызнаныя гісторыка-культурнай каштоўнасцю, таму клапаціцца аб іх захаванасці павінна дзяржава.

Але грошай на гэта ў мясцовых органаў улады не было, і яшчэ ў 2023 годзе быў адкрыты дабрачынны рахунак для збору ахвяраванняў на захаванне храма. Зараз, нарэшце, пачынаюцца работы па падрыхтоўцы кансервацыі.

Як мы заўважылі, у канцы траўня Ушацкі райвыканкам правёў закупку паслугі па складанні каштарысу па праграме работ на кансервацыю гэтай гісторыка-культурнай каштоўнасці ў Селішчы. Гэта значыць, выканаўца павінен падлічыць, у колькі абыдуцца працы, і пасля гэтага — калі грошай хопіць — пачнецца кансервацыя.

Якую суму ахвяраванняў сабралі ўлады амаль за тры гады, пакуль не паведамлялася. Пытанне захавання гэтага велічнага храма не раз абмяркоўвалася ў сацсетках, высокая цікавасць да гэтай тэмы паказвала, што лёс касцёла хвалюе грамадскасць. Некаторыя актывісты паведамлялі, што пісалі звароты ва Ушацкі райвыканкам з просьбай аб кансервацыі руін.

Зараз, мяркуючы па апошніх водгуках турыстам, храм працягвае разбурацца, сцены руйнуюцца, з іх падае цэгла — заходзіць унутр і знаходзіцца побач з будынкамі небяспечна.

Аналагічная сітуацыя з іншым вядомым закінутым касцёлам – святога Мікалая ў вёсцы Княжыцы. У канцы 2025 года Магілёўскі райвыканкам аб'яўляў аб зборы ахвяраванняў для кансервацыі гэтых руін.