Упершыню ў Беларусі Свята буслоў зладзіць каталіцкая парафія

Айцец Чэслаў Курэчка МІС запрашае ў Росіцу на Свята буслоў, якое запланавана на 30 красавіка 2016 года. Асноўныя ідэі свята - абарона беларускіх сем’яў перад сучаснымі выклікамі, малітва за Беларусь, клопат аб навакольным асяроддзі ў Беларусі.

“Гэтая птушка – сімвал Беларусі і сімвал сям’і. Хочацца падкрэсліць гэтым святам неабходнасць абароны нашай Бацькаўшчыны і сям’і ад усялякага зла. Калі ў беларусаў будуць святыя і добрыя сем’і, ніякая бяда нам не страшная. І канешне, мяне як аматара прыроды, хвалюе экалагічны стан нашай зямлі. Папа Францішак заклікае ў сваёй энцыкліцы “Laudato si” бараніць прыроду, бо яна – Божы дар. Таму вось такім птушыным святам, спадзяюся, нам удасца яшчэ раз нагадаць пра сур’ёзныя выклікі нашага часу і заахвоціць людзей змагацца з імі”, – падзяліўся святар пра сваю новую мару, піша Сatholicnews.by. Яшчэ трывае сакавік, а ў Росіцы ўсё ўжо прадумана. Гатовыя нават тры буслянкі.

Дарэчы, да 8 сакавіка святар падарыў сваім парафіянкам цюльпаны, якія вырасціў сам. Нагадаем, кс. Чэслаў Курэчка ў гэтым годзе ўдастоены прэзідэнцкай прэміі «За духоўнае адраджэнне».