25 гадоў сестры Маці Тэрэзы служаць у Беларусі. ФОТЫ свята

4 жніўня 2018 г. у Гомелі дзякавалі Богу за 25 гадоў служэння сясцёр Маці Тэрэзы ў мясцовай каталіцкай парафіі і ў горадзе. Сёстры запрасілі ўсіх жадаючых на ўрачыстую святую Імшу ў іх Доме Міласэрнасці, а затым наладзілі пачастунак. Дарэчы, у той жа дзень у Каталіцкім Касцёле адзначалі памяць св. Яна Марыі Віанэя, заступніка святароў і асабліва пробашчаў. Таму мясцовыя святары таксама не засталіся без віншаванняў і малітваў.

Святочную Імшу ўзначаліў дапаможны біскуп Пінскай дыяцэзіі Казімір Велікаселец, казанне прачытаў дэкан Гомельскага дэканата кс. Тадэвуш Саморэк. Ён упэўнены, што сёстры прыехалі ў Беларусь, бо гэтага пажадаў Бог. У 1993 годзе першыя прадстаўніцы кангрэгацыі «Місіянерак міласэрнасці» прыбылі ў Беларусь па благаславенні Папы Яна Паўла II, і іх прысутнасць на Гомельшчыне кс. Тадэвуш лічыць Божым благаслаўленнем. «Я часта прыязджаю ў гомельскі Дом міласэрнасці, і ні разу такога не здаралася, каб я першы ўсміхаўся сёстрам. Яны заўсёды мяне апярэджваюць ва ўсмешцы», - адзначыў святар.

Ен дадаў, што сестры вучаць нас бачыць у кожным чалавеку Езуса Хрыста.

Пасля службы гомельскія парафіяне горача дзякавалі сестрам, а затым падарылі ім і святарам букеты кветак і цукеркі.

Нагадаем, адзіныя ў Беларусі прадстаўніцы ордэна Маці Тэрэзы служаць у Гомелі. Законніцы розных нацыянальнасцяў утрымліваюць Дом міласэрнасці, у якім дапамагаюць бедным і бяздомным ўжо 25 гадоў і займаюцца многімі справамі міласэрнасці. Дом сясцёр служыць прытулкам для некалькіх хворых мужчын і жанчын, якія апынуліся на вуліцы без сродкаў да існавання. Сестры даглядаюць за імі, лечаць, дапамагаюць кінуць піць, аднавіць дакументы і ўладкавацца на працу. Місіянеркі рыхтуюць абеды для бяздомных, раздаюць прадукты і адзенне для бедных сем'яў і адзінокіх старых, дапамагаюць дзецям з малазабяспечаных і праблемных сем'яў. Наогул, дапамагчы сестрам у гэтай справе можа кожны: напрыклад, раздаць ежу, памыць посуд, прынесці вопратку ці абутак.

Фота Алены Германовіч