У гомельскім касцёле пачынаецца катэхізацыя

У гомельскай рымска-каталіцкай парафіі пачынаецца навучальны год для дзяцей, якія наведваюць Нядзельную школу. Прыводзім расклад заняткаў па ўзростах. Нагадаем, паводле вучэння Касцёла, перадача веры з'яўляецца самай галоўнай задачай і абавязкам бацькоў-хрысціянаў. Тыя, хто не паспеў запісацца, могуць прыходзіць ва ўказаны ніжэй час і ўнесці дадзеныя дзіцяці проста на занятках.

Такім чынам, катэхезы (заняткі па рэлігіі) для дзяцей, якія рыхтуюцца да прыняцця Першай камуніі, будуць праходзіць у класах на першым паверсе касцёла па нядзелях з 10.30 да 11.30 у дзвюх групах для дзяцей ва ўзросце 7-11 гадоў (з другога класа агульнаадукацыйнай школы). У гэты час у розных класах будуць адначасова працаваць групы 1-га года падрыхтоўкі і 2-га года падрыхтоўкі да Першай камуніі. Пры гэтым дзіця з бацькамі можа наведаць нядзельную Імшу ў 9.00 або 12.00.

Для дзяцей, старэйшых за 12 гадоў, такія заняткі будуць праходзіць па суботах з 11.00 да 12.00.

Дзеці, якія ўжо прыступаюць да Камуніі, таксама будуць займацца па суботах. 4-6 клас агульнаадукацыйнай школы - з 9 да 10 гадзін раніцы. 7-8 клас - з 10 да 11 гадзін. 9-11 клас - з 16 да 17 гадзін.

А для самых маленькіх вучняў, дзяцей ад 3 да 7 гадоў, заняткі будуць праходзіць у Доме міласэрнасці сясцёр Маці Тэрэзы (вул. Савецкая, 146а). Час на выбар - субота ў 10.00 ці нядзеля ў 15.00.

Дарэчы, упершыню ў парафіі праводзіцца набор дзяўчынак малодшага школьнага ўзросту ў «Божыя кароўкі» - гэта «пачатковы ўзровень» каталіцкага скаўтынга для дзяўчынак. А ў кастрычніку плануецца пачаць сустрэчы ў «Школе веры» для дарослых і моладзі - для тых, хто жадае падрыхтавацца да сакрамэнтаў і ўмацаваць сваю веру. Таксама ў парафіі будуць праходзіць асобныя сустрэчы для студэнтаў і моладзі. Інфармацыя пра гэта з'явіцца пазней.