Папа - пра родную мову: «Гэта абарона ад ідэалагічнай і культурнай каланізацыі»

У Міжнародны дзень роднай мовы, які адзначаецца 21 лютага, Беларуская рэдакцыя Ватыканскага радыё зрабіла падборку цытат Папы Францішка на тэму роднай мовы. Паводле Святога Айца, “матчыная мова – гэта абарона ад ідэалагічнай і культурнай каланізацый, супраць уніфікацыі мыслення, мэтай якой – знішчыць разнастайнасць”. Падчас ранішняй Эўхарыстыі, якую цэлебраваў 23 лістапада 2017 г. у капліцы сваёй ватыканскай рэзідэнцыі, Папа казаў, што адным з індыкатараў ідэалагічнай каланізацыі з’яўляецца знішчэнне памяці і мясцовай гаворкі. 

Каланізатары нібыта кажуць: “Гісторыя пачынаецца з мяне, пачынаецца зараз, грунтуецца на тым, што я распавядаю, а не на памяці, якая вам была перададзена”. Захоўваць родную мову значыць супрацьстаяць такой культурнай экспансіі, бо, на думку Францішка, не існуе культурнай каланізацыі, якая магла б перамагчы дыялект.

Папа заўважыў, што ў захаванні памяці і дыялекту заўсёды былі моцнымі жанчыны, прыклады чаго існуюць ад біблійных часоў да генацыдаў мінулага стагоддзя. Перадаючы веру, грунтуючыся пры гэтым на памяці і дыялекце, жанчыны вучаць дзяей сапраўдным каштоўнасцямі і такім чынам бароняць гісторыю ўсяго народа.

Аб важнасці перадачы веры на асаблівым дыялекце Францішак казаў 7 студзеня 2018 г., падчас св. Імшы ў ватыканскай Сікстынскай капэле, калі хрысціў дзяцей супрацоўнікаў ватыканскіх структур. Вучыць дзяцей веры трэба на “дыялекце сям’і, дыялекце бацькі і маці, дзядулі і бабулі”. Гэтым дыялектам, з’яўляецца “мова любові”, на якой бацькі размаўляюць паміж сабой. Калі яе не будзе ў сямейным асяроддзі, здзейніць перадачу веры, якая з’яўляецца нялёгкай справай, будзе немагчыма, лічыць Папа.