Уратаваць капліцу. У сацсетцы задалі пытанне – мы знайшлі адказ

Як мы заўважылі, у сацсетку выклалі свежыя здымкі старадаўняй прыдарожнай капліцы ў вёсцы Гарадзец Шаркаўшчынскага раёна Віцебскай вобласці. Аўтар фота занепакоеная станам капліцы: «Куды можна звярнуцца, каб паправілі дах капліцы? Вельмі прыгожая, шкада, калі пачне разбурацца ад дажджоў».

Мы таксама зацікавіліся лёсам і гісторыяй капліцы і высветлілі, хто павінен сачыць за яе станам. Бліжэйшы каталіцкі храм да капліцы знаходзіцца ў суседняй вёсцы – Лужкі.

Але аказалася, што капліца не адносіцца да маёмасці парафіі і не звязаная з ім.

Гэтая капліца з фігурай Езуса Хрыста, які нясе крыж, стаіць на кургане, які, паводле легенды, са слоў мясцовых пажылых людзей, быў абсыпаны французскімі жаўнерамі, якія адступалі з Расіі пасля кампаніі Напалеона. Нібыта кожны жаўнер прыносіў па адным боце зямлі і сыпаў на целы забітых таварышаў.

Аднак капліца была пабудавана ў 1775 годзе, тады як адступленне Напалеона адбывалася значна пазней – у 1812 годзе. Магчыма, французскія жаўнеры і насыпалі курган на месцы капліцы, але першапачаткова яна не мела да іх ніякага дачынення.

На самой справе гэтая капліца – частка сядзібнага комплексу Зіберг-Плятэраў, пабудаванага ў канцы XVIII стагоддзя. Яна з'яўляецца гісторыка-культурнай каштоўнасцю, помнікам архітэктуры, як пазначана ў Банку звестак аб гісторыка-культурнай спадчыне Беларусі.

З гэтага вынікае, што сачыць за яе станам павінен дзяржаўны орган, на балансе якога знаходзіцца аб'ект. Гэта можа быць мясцовы сельвыканкам (Лужкоўскі) – як у выпадку з руінамі касцёла ў Драгічынскім раёне.

Але з капліцай сітуацыі асаблівая. Яе ўласнікам можа быць і сельгаспрадпрыемства «Гарадзец». Менавіта гэтая гаспадарка з'яўляецца ўладальнікам некаторых аб'ектаў комплексу сядзібы Зіберг-Плятэраў. Сам палац выкарыстоўваецца часткова для адміністрацыі сельгаспрадпрыемства.

Наш канал в Telegram – только интересное и важное. Подписаться >