Мінздар адрэагаваў на крытыку праекта па медыцынскай этыцы

Міністэрства аховы здароўя Беларусі апублікавала паведамленне з падзякай «за праяўленую цікавасць і абмеркаванне праекта пастановы «Аб зацвярджэнні норм медыцынскай этыкі і дэанталогіі». Нагадаем, праект, дзе прапісвалі патрабаванні да знешняга выгляду медработнікаў, у прыватнасці забарона на «відавочную дэманстрацыю сваёй рэлігійнай прыналежнасці, адкрытае нашэнне рэлігійных знакаў і сімвалаў», выклікаў бурнае абмеркаванне. Да кіраўніка Міністэрства аховы здароўя звярнуліся прадстаяцелі Праваслаўнай і Каталіцкай цэркваў з крытыкай праекту.

- Прапановы і заўвагі прыняты пад увагу. Грамадскае абмеркаванне па праекце спынена ў сувязі з яго дапрацоўкай, - адзначаецца ў паведамленні Міністэрства аховы здароўя. У інфармацыі гаворыцца таксама пра тое, што аб паўторным грамадскім абмеркаванні будзе паведамлена дадаткова.