Бясплатны Калядны канцэрт далі лепшыя музыканты Гомеля [фота, відэа]

У гомельскай рыма-каталіцкай царкве 29 снежня адбыўся традыцыйны Калядны канцэрт. Музычнае свята ў касцёле ўжо шмат гадоў ладзіць Таццяна Томсан і яе сябры - лепшыя музыканты горада, у тым ліку лаўрэаты міжнародных конкурсаў, удзельнікі Гомельскага сімфанічнага аркестра.

Зала сустрэла музыкаў аншлагам - канцэрт наведалі не толькі вернікі царквы, але і многія аматары класічнай музыкі.

- Хвалеце Бога ў святыні Ягонай, хвалеце Яго на цвердзі сілы Ягонай. Хвалеце Яго паводле магутнасьці Ягонай, хвалеце Яго паводле мноства велічы Яго. Хвалеце Яго гукам трубным, хвалеце Яго на псалтыры і арфе. Хвалеце Яго з бубнам і танцамі, хвалеце Яго на струнах і аргане. Хвалеце Яго на гучных кімвалах, хвалеце Яго на кімвалах гучнагалосых. Ўсё, што дыхае, ды хваліць Госпада! Алілуя, - зачытаў Псальму 150 пробашч храма айцец Славамір перад пачаткам музычнага вечара. - Давайце разглядаць канцэрт менавіта з гэтай пазіцыі. Хай музыка нагадае нам, што наша Айчына - у Нябёсах!

Музыкі выканалі класічныя творы і кампазіцыі сучасных аўтараў.